മുംബൈ: അസംഘടിതമേഖലയിലെ തൊഴിലാളികളുടെ ദിവസക്കൂലി കേരളത്തില്‍ ദേശീയ ശരാശരിയുടെ ഇരട്ടി. റിസര്‍വ് ബാങ്ക് ഓഫ് ഇന്ത്യ കഴിഞ്ഞദിവസം പുറത്തുവിട്ട റിപ്പോര്‍ട്ടിൽ ആണിത് സൂചിപ്പിച്ചിരിക്കുന്നത്. ജമ്മു-കശ്മീരും തമിഴ്‌നാടും ആണ് കേരളത്തിന് പിന്നില്‍ രണ്ടും മൂന്നും സ്ഥാനങ്ങളില്‍ നില്‍ക്കുന്നത്. മധ്യപ്രദേശും ത്രിപുരയും ഗുജറാത്തും ഉത്തര്‍പ്രദേശും ഏറ്റവും പിന്‍നിരയിലും സ്ഥാനംനേടി.
ആര്‍ബിഐ പുറത്തുവിട്ട ഹാന്‍ഡ്ബുക്ക് ഓഫ് സ്റ്റാറ്റിസ്റ്റിക്സ് ഓണ്‍ ഇന്ത്യന്‍ സ്റ്റേറ്റ്‌സ് ഫോര്‍ 2023-24ല്‍ സംസ്ഥാനങ്ങള്‍ തമ്മില്‍ വന്‍ അന്തരമുള്ളതായി ചൂണ്ടിക്കാട്ടുന്നു. കേരളത്തില്‍ ഗ്രാമീണമേഖലയിലെ പുരുഷ കര്‍ഷകത്തൊഴിലാളികളുടെ ശരാശരി ദിവസക്കൂലി കേരളത്തില്‍ 807.2 രൂപയാണെങ്കില്‍ രണ്ടാംസ്ഥാനത്തുള്ള ജമ്മു-കശ്മീരില്‍ അത് 566.1 രൂപയും മൂന്നാംസ്ഥാനത്തുള്ള തമിഴ്‌നാട്ടില്‍ 540.6 രൂപയുമാണ്. 372.7 രൂപയാണ് ദേശീയ ശരാശരി. മധ്യപ്രദേശാണ് കൂലിയുടെ കാര്യത്തില്‍ ഏറ്റവുംപിന്നില്‍. അവിടെ ശരാശരി ദിവസക്കൂലി 242.2 രൂപ മാത്രമാണ്. ഗുജറാത്ത് (256.1), ഉത്തര്‍പ്രദേശ് (334.4) ത്രിപുര (337.2) എന്നീ സംസ്ഥാനങ്ങളും ഏറ്റവും പിന്നിലുണ്ട്.
ഗ്രാമീണ നിര്‍മാണമേഖലയില്‍ ജോലിചെയ്യുന്ന പുരുഷന്മാരുടെ ശരാശരി ദിവസവേതനം കേരളത്തില്‍ 893.6 രൂപയാണ്. ജമ്മു-കശ്മീര്‍ (552.2), തമിഴ്‌നാട് (539.7) സംസ്ഥാനങ്ങള്‍തന്നെയാണ് തൊട്ടടുത്ത്. 471.3 രൂപയാണ് ദേശീയ ശരാശരി. മധ്യപ്രദേശ് (292.4), ത്രിപുര (322.2), ഗുജറാത്ത് (344.4) എന്നീ സംസ്ഥാനങ്ങളാണ് ഏറ്റവുംപിന്നില്‍.
2014-15 വര്‍ഷം കേരളത്തിലെ നിര്‍മാണത്തൊഴിലാളികളുടെ ശരാശരി ദിവസക്കൂലി 787.9 രൂപയായിരുന്നു എന്ന് ആര്‍ബിഐയുടെ കണക്കില്‍ പറയുന്നു. കേരളവും തമിഴ്‌നാടും ഉള്‍പ്പെടെയുള്ള സംസ്ഥാനങ്ങളിലേക്ക് ഉത്തരേന്ത്യയില്‍നിന്ന് വന്‍തോതില്‍ തൊഴിലാളികള്‍ വരുന്നത് എന്തുകൊണ്ടാണെന്ന് ഈ കണക്കില്‍നിന്ന് വ്യക്തമാണ്.
